لم أكن كباقي طلاب كلية الإعلام في سؤال من سبقوهم السؤال المعتاد (أدخل قسم إيه؟!!) ،كانت رغبتي من البداية هي قسم صحافة ولكن مع دخولي هذا القسم إكتشفت إنني كنت مخطأ.
بدأت الحكاية عند نجاحي في مقابلة قسم الصحافة وشعرت وقتها أن الدنيا إبتسمت لي لكن سرعان ماإكتشفت إنها مجرد أحلام وردية وسقطت علي أرض الواقع لأجد نفسي في قسم لايثمن ولايغني من جوع.
رجعت مرة أخري لأقول لنفسي "أنا هبدأ من الصفر وأعمل نفسي وهبقي حاجة جامدة جدا" ، سمعت شوية ناس إصحابي بيقولولي تعالي معانا إتدرب في جرنال كذا أروح وأكتشف إني مش فاهم حاجة ومطلوب مني شغل معرفش بيتعمل إزاي ، أقول لنفسي يمكن البداية كده وأحاول بس كنت بفشل.
بعد كل محاولاتي في التدريب في السنة الثانية في كلية الإعلام إكتشفت إن كل رؤساء الأقسام اللي إتدربت معاهم نظرتهم لينا كالتالي " إحنا معانا شوية ناس عايزين يتدربوا هنعاملهم معاملة سمك في مية ، نرميهم كلهم في المية ونشوف مين أطول نفس فيهم وهوا ده اللي هناخده" بس أنا الحقيقة كنت من أصحاب النفس القصير أو بالمعني الصحيح كنت ميت.
وصلت للسنة الثالثة قالوا في تدريب في الكلية قولت كويس والدنيا هتضحكلي تاني ،إتدربت تدريب الكلية في مجلة صوت الجامعة اللي هيا أصلًا مش بتطلع بس إدارة الكلية بتوهمك إنها وفرتلك تدريب والسلام.
الغريب في الأمر أن التدريب ده تيرم واحد يعني حوالي 3 شهور...تدريب 3 شهور في كلية أربع سنين يعني تقريبًا مفيش تدريب ، طب دا بتوع إذاعة بيتدربوا من سنة ثانية يعني بيتدربوا ثلاث سنوات وأنا أتدرب 3 شهور..بعد كل ده أكتشف إني كنت لازم أسأل قبل ماأدخل قسم صحافة.
ده مش حالي أنا لوحدي ده حال كل طالب في كلية الإعلام قسم صحافة حاسس إنه مظلوم في كلية مفهاش تدريب ،بس فيها وهم.
