Silsila Sa Janaab ! Banta Gaya

after the very long period.....
Ik Haqeeqat Wo Khwaab Banta Gaya
Aks Paani Mein Dekhnay Ke Lye
Kaisay Chehra Gulaab Banta Gaya
Ham Ne Koi Sawaal Tak Na Kia
Wo Mukammal Jawaab Banta Gaya
Pehlay Unwaan Tha Wafa Ka Jo Shakhs
Baad Mein Wo Kitaab Banta Gaya
Neend Ka Tootna Bhee Apni Jaga
Khwaab Bhee Ek Azaab Banta Gaya
Dekhnay Mein Tha Ek Lafz Magar
Ishq Poora Nisaab Banta Gaya
Ham Haqeeqat Samajh Rahay Thay Jisay
Rafta Rafta Saraab Banta Gaya
Saaray Aalam Mein Ham Howay Tanha
Sab Ka Wo Intekhaab Banta Gaya
Pehlay Dil Torna Bura Tha Byshaq
Baad Mein Ye Sawaab Banta Gaya